ရန်ကုန် ကျောက်တံတားမြို့နယ် အတွင်း ဆောင်ရွက်နေသည့် လမ်းဘေးခွေးများကို ဖမ်းပြီး ခွေးဂေဟာ ပို့သည့် အစီအစဉ်ကို တိရိစ္ဆာန် ချစ်သူများက ဖမ်းထားသည့် ခွေးများကို လုယူခဲ့သည့် အတွက်ကြောင့် ယနေ့တွင် ရပ်နားလိုက်ရကြောင်း ကျောက်တံတားစည်ပင်ဥက္ကဌက ပြောကြားခဲ့ပါတယ်။
ဒုတိယမြို့တော်ဝန် စီမံမှုဖြင့် ကျောက်တံတားမြို့နယ်ထဲက လမ်းဘေးခွေးများကို လှိုင်မြို့နယ်သို့ ပို့ဆောင်ရန် ယနေ့ စီစဉ်နေစဉ် တိရိစ္ဆာန် ကာကွယ်ရေးမှဟုဆိုကာ လူတစ်စုက ဖမ်းဆီးသူများကို ပြသနာရှာပြီး ခွေးများ လုယူမှုအား ဒုတိယမြို့တော်ဝန်ထံ တင်ပြထားတယ်လို့ ၄င်းက ဆိုပါတယ်။
“သူတို့ ဖမ်းတာကို လာတား၊ ခွေးကိုလဲ လုယူတယ်။ ဒီကိစ္စကို ဒုမြို့တော်ဝန်ဆီတင်ပြထားတယ်။”လို့ ကျောက်တံတားစည်ပင်ဥက္ကဌက ပြောဆိုခဲ့ပါတယ်။
ဒီလိုဖြစ်စဉ် ဖြစ်ခဲ့တာကြောင့် စည်ပင်သာယာရေးကော်မတီအနေနဲ့ လမ်းဘေးခွေးတွေဖမ်းဆီးပြီး ခွေးဂေဟာ ပို့ဆောင်ကာ မျိုးဆက်ခြားပေးတဲ့ အစီအစဉ်ကို ယာယီရပ်ဆိုင်းထားရတယ်လို့ သိရပါတယ်။
ခွေးရူးရောဂါဖြစ်ပွားမှုနဲ့ လေလွင့်ခွေးတွေများပြားလာတာကို မြန်မာနိုင်ငံ တိရစ္ဆာန်ဆေးကုဆရာဝန်များအသင်းနဲ့ ထိုင်းနိုင်ငံ Mission Rabies, WVS အဖွဲ့ တို့ ပူးပေါင်းပြီး ရှေ့ပြေးစီမံချက် အနေနဲ့ ခွေးတွေကို ခွေးရူးရောဂါ ကာကွယ်ဆေးထိုးတာတွေနဲ့ မျိုးဆက်ခြားတာတွေကို လုပ်ဆောင် ပေးနေတာဖြစ်ပါတယ်။
မြန်မာနိုင်ငံမှာ လေလွင့်ခွေးပေါင်း ၄ သန်းနီးပါးရှိပြီး ရန်ကုန်မြို့မှာတော့ ၁ သိန်းခွဲ ခန့်ရှိတယ်လို့သိရပါတယ်။ပြီးခဲ့တဲ့နှစ်က တစ်နိုင်ငံလုံးမှာ ခွေးကိုက် ခံရမှုပေါင်း တစ်သိန်းကိုးသောင်းကျော်ရှိခဲ့တယ်လို့လည်း သိရပါတယ်။ ဒါ့ကြောင့် မြန်မာနိုင်ငံဟာ ခွေးကိုက်ခံရမှုအများဆုံးနဲ့ ခွေးရူးရောဂါ ဖြစ်ပွားမှု အများဆုံးနိုင်ငံတွေထဲမှာ ပါဝင်နေပါတယ်။
