မန်ယူတိုက်စစ်မှူး လူကာကူက ကွန်တီဟာ ကမ္ဘာ့အကောင်းဆုံး နည်းပြပါလို့ ညွှန်းဆိုလိုက်ပြီး စီးရီးအေမှာ အီတလီ နည်းပြနဲ့အတူ လက်တွဲလုပ်ခွင့်ရဖို့ မျှော်လင့်နေတယ်လို့ ပြောလာပါတယ်။

ယူနိုက်တက်ဟာ စိတ်ပျက်စရာ ၂၀၁၈-၂၀၁၉ ရာသီ ပြီးတဲ့နောက် နွေရာသီမှာ အသင်းကို ပြုပြင်ပြောင်းလဲမှုတွေ လုပ်ဖို့ စီစဉ်နေပြီး လူကာကူအနေနဲ့ နောက်ရာသီမှာ အင်တာမီလန်ကို ရောက်ရှိဖို့ သတင်းကြီးနေတာပါ။

လူကာကူက ” ကွန်တီက အင်တာမီလန်ကို သွားခဲ့တယ်။ ကျနော့်အတွက် သူက ကမ္ဘာ့အကောင်းဆုံး နည်းပြပါ။ ကျနော်က စီးရီးအေ ပရိသတ်ပါ။ အင်္ဂလိပ်လိဂ်နဲ့ အီတလီမှာ ကစားခွင့်ရဖို့ ကျနော် အမြဲ အလိုရှိခဲ့တယ်။

အီတလီကို ကျနော် ချစ်ပါတယ်။ ပြီးတော့ ခရစ္စတီယာနို ရော်နယ်ဒို ရှိတယ်။ ဆာရီကလဲ ဂျူဗင်တပ်ကို သွားတော့မယ်။ အန်ဆယ်လော့တီကလဲ နာပိုလီမှာပါ။ စီးရီးအေက စိတ်လှုပ်ရှားစရာ ကောင်းမှာပါ။

ကျနော့် ကလပ်နဲ့ အေးဂျင့်က အပြောင်းအရွှေ့ ကိစ္စ အတွက် စကားပြောမှာ ဖြစ်ပေမယ့် ကျနော်က ဆုံးဖြတ်ချက် ချခဲ့ပြီးပါပြီ။ ဒီနွေရာသီက အတော် အလုပ်ရှုပ်လိမ့်မယ် ဆိုတာ သေချာပါတယ် ” လို့ ပြောဆိုခဲ့တာ ဖြစ်ပါတယ်။

လူကာကူဟာ ဟိုဆေးမော်ရင်ညို လက်ထက် ၂၀၁၇ နွေရာသီမှာ အဲဗာတန်ကနေ ပြောင်းရွှေ့လာပြီးကတည်းက မန်ချက်စတာ ယူနိုက်တက် မှာ နှစ်ရာသီ ကြာခဲ့ပြီ ဖြစ်ပါတယ်။

သရဲနီတွေအတွက် ၉၆ ပွဲမှာ ၄၂ ဂိုး သွင်းယူခဲ့ပေမယ့်လဲ လူကာကူဟာ အိုးလ်ထရက်ဖို့ဒ်မှာ နေရာရဖို့ ရုန်းကန်ခဲ့ရပါတယ်။ ပုံမှန်ပွဲထွက်ခွင့် မရနိုင်တဲ့နောက် လူကာကူဟာ မန်ချက်စတာကနေ ထွက်ခွာဖို့ ကြိုးစားလာဖွယ် ရှိနေပါတယ်။