ဖူလ်ဟမ်အသင်းနဲ့ ကာရာဘောင်းဖလား ဆီမီးဖိုင်နယ်ပွဲကြိုမှာ ထရန့် ဒဏ်ရာရသွားပြီလို့ လီဗာပူးအသင်းက ကြေညာချက် ထုတ်ပြန်ပါတယ်။
အာဆင်နယ်ကို ၂-၀ နဲ့ အနိုင်ရတဲ့ အက်ဖ်အေဖလား ပွဲစဉ်အပြီး ထရန့် ဒဏ်ရာ အနည်းငယ် ရသွားခဲ့တာပါ။ ညာအစွန်လူဟာ ဒီဒဏ်ရာကြောင့် ၃ ပတ်ဝန်းကျင် အနားယူရမှာဖြစ်ကာ လီဗာပူးရဲ့ ပွဲစဉ် ၄ ပွဲလောက်ကို လွဲချော်သွားပါမယ်။
ကြားရက်မှာ ယှဉ်ပြိုင်ရမယ့် ကာရာဘောင်းပွဲကို သေချာပေါက် လွဲမှာဖြစ်သလို ဘုန်းမောက်နဲ့ ပရီးမီးယားလိဂ်ပွဲ၊ ဖူလ်ဟမ်နဲ့ ကာရာဘောင်း အဝေးကွင်းပွဲတွေကို လွဲချော်သွားပါမယ်။ သူဟာ လကုန် ချယ်ဆီးနဲ့ ယှဉ်ပြိုင်ရမယ့် ပရီးမီးယားလိဂ်ပွဲမှာ ပါဝင်နိုင်ဖို့ မသေချာပါဘူး။
လီဗာပူးအသင်းဟာ ပရီးမီးယားလိဂ် ဇယားထိပ်မှာ ရှိနေပေမယ့် ဇန်နဝါရီလတွင်း ဆာလာကို အာဖရိကပွဲတွေအတွက် လက်လွတ်ထားရကာ ယခု ထရန့် သတင်းဆိုး ပေါ်ထွက်လာခြင်း ဖြစ်ပါတယ်။
ဒီအပတ်မှာ မန်စီးတီးဟာလည်း နယူးကာဆယ်အသင်းကို အဝေးကွင်း သွားရောက် ယှဉ်ပြိုင်ရမှာ ဖြစ်ပါတယ်။ နည်းပြဂွာဒီယိုလာကတော့ ကလော့ပ်နဲ့ မတူဘဲ သတင်းကောင်းတွေရနေပါတယ်။
စီးတီးနည်းပြကတော့ ” နယူးကာဆယ်နဲ့ ခက်ခဲတဲ့ပွဲအတွက် ဒီဘရိုင်း၊ ဟာလန်း၊ ဒိုကူ၊ ဂရီလစ်တို့ အားလုံး ပြန်လာပါပြီ။ ရာသီကုန်ထိ မတူညီတဲ့ ပြိုင်ပွဲတွေမှာ ဆက်လက် ယှဉ်ပြိုင်နိုင်ဖို့ အားလုံးကို လိုအပ်တာ ဖြစ်ပါတယ် ” လို့ ပြောဆိုသွားပါတယ်။
