လာမယ့်နွေမှာ မန်ချက်စတာ ယူနိုက်တက် နည်းပြ တန်ဟက် အတွက် နံပါတ် တစ် ဦးစားပေး ပစ်မှတ် ဖြစ်နေတဲ့ စပါး တိုက်စစ်မှုး ကိန်းကို ခေါ်ယူဖို့ ယူနိုက်တက် က ခြေလှမ်းစတင် လှုပ်ရှားပြီ ဖြစ်ပါတယ်။
ကိန်းဟာ နွေမှာ တော့တင်ဟမ် စပါးအသင်းနဲ့ သက်တမ်းတိုး တော့မှာ မဟုတ်ဘဲ အသင်းပြောင်းဖွယ် ရှိလာပါတယ်။
တယ်လီဂရပ်သတင်းဌာနမှ လန်ဒန်သတင်းထောက် မတ်လော အဆိုအရ ယူနိုက်တက်ဟာ ကိန်းအတွက် ကမ်းလှမ်းမှုလုပ်ဖို့ ပလန်ချနေပြီး သူ့ရဲ့ တန်ကြေးကို သိလိုနေပါတယ်။ ဒါ့အပြင် စပါး ဥက္ကဋ္ဌ လီဗိုင်းကို ဘယ်လို ညိနှိုင်းမှုလုပ်ရမယ် ဆိုတာကိုလည်း အဖြေရှာလိုနေပါတယ်။
ကိန်းအတွက် ယူနိုက်တက်ဘက်က အလေးအနက် ကမ်းလှမ်းမှု ဝင်ရောက်မယ့် ကိစ္စဟာ အင်္ဂလန်သား ကို လုံးဝ လက်လွတ်ခံလိုခြင်း မရှိတဲ့ လီဗိုင်းအတွက်တော့ သတင်းဆိုးပဲ ဖြစ်ပါတယ်။ ဒီနှစ်သင်းဟာ ကြားရက်မှာ ပရီးမီးယားလိဂ် ပြိုင်ဘက်တွေ အဖြစ် တွေ့ဆုံကြဦးမှာပါ။
ဒီရာသီကုန်ရင် စပါးအသင်းနဲ့ စာချုပ် ၁၂ လပဲ ကျန်ရှိတော့မယ့် ကိန်းဟာ လန်ဒန်ကလပ်မှာ ဆက်နေဖို့ အတော်လေး အခွင့်အရေး နည်းနေခဲ့ပါပြီ။
ပြီးခဲ့တဲ့ ပွဲမှာ နယူးကာဆယ်ကို ၆-၁ ရလဒ်နဲ့ အရှက်ရစရာ အရေးနိမ့်ပြီး လာမယ့်ရာသီ စပါးအသင်းက ချန်ပီယံလိဂ် ဝင်ခွင့်တောင် မသေချာတော့တဲ့ အပေါ် ကိန်းက အတော် စိတ်ပျက်နေပါတယ်။
အင်္ဂလန်ပြင်ပ လိဂ်တွေကနေ ကိန်းကို ခေါ်ယူလိုရင် ပြောင်းရွှေ့ကြေး ပေါင် သန်း ၈၀ ဝန်းကျင်နဲ့အတူ လီဗိုင်းနဲ့ ဆွေးနွေးရပါမယ်။ ဒါပေမယ့် အင်္ဂလန်ကလပ် တစ်သင်းက ကိန်းကို ခေါ်ယူလိုရင်တော့ စပါး ဥက္ကဋ္ဌဟာ ပေါင် သန်း ၁၀၀ ထက် ပိုနည်းတဲ့ ပမာဏနဲ့ ကမ်းလှမ်းခံမှာ မဟုတ်ပါဘူး။
လီဗိုင်း ကို ညိနှိုင်းရတာက ဘယ်လောက် ခက်မလဲဆိုတာ နားလည်ထားတဲ့ ယူနိုက်တက်က နာပိုလီ တိုက်စစ်မှူး အိုဆင်ဟမ် ကိုလည်း နောက်ထပ် ပစ်မှတ်အဖြစ် ရွေးချယ်ထားပါတယ်။
