အလွန်ဆိုဟာ မနှစ်က ရာသီမှာ နည်းပြနေရာလွတ်နေခဲ့တဲ့ မိုချင်ဂလာဘတ်နဲ့ စကားပြောဆိုခဲ့ပြီး တခြားထိပ်သီးကလပ်တွေနဲ့လည်း မကြာခဏ ချိတ်ဆက်မှု ရှိခဲ့တာ ဖြစ်ပါတယ်။ ဒါပေမယ့် သူကတော့ ထိပ်တန်းကလပ်တစ်ခုအတွက် လက်ရှိ ရီးရဲလ်ဆိုစီဒက်က သူ့နေရာကို စွန့်ခွာဖို့ အလျင်စမလို ဖြစ်မနေဘူးလို့ ဝန်ခံခဲ့ပါတယ်။
“ လူတိုင်းမှာ သူတို့ရဲ့ ကိုယ်ပိုင်ဆုံးဖြတ်ချက်တွေ ရှိပါတယ်။ ကျွန်တော် ကိုယ့်ဘာသာကိုယ် နောက်အဆင့်တွေတက်ဖို့ ကြိုးပမ်းသွားမှာပါ။ ဒီအတွက် တွန်းအားပေးခံမှာ မဟုတ်ပါဘူး။ ကျွန်တော့်မှာ ထိပ်တန်းအသင်းတစ်သင်းကို နည်းပြဖို့ ရည်ရွယ်ချက် ရှိပါတယ်။ ဒါပေမယ့် အလျင်စလို ဖြစ်မနေပါဘူး။
အခု ရှိနေတဲ့နေရာမှာ ကျွန်တော် အရမ်း ပျော်ရွှင်နေပါတယ်။ အခုချိန်မှာ ကျွန်တော့်ရဲ့ ရည်မှန်းချက်က ဒီနှစ် ဆီဂန်ဒါမှာ ကျွန်တော်တို့ရဲ့ နေရာကို ဆက်ထိန်းသိမ်းထားဖို့ပါပဲ”လို့ ပြောဆိုခဲ့ပါတယ်။
အလွန်ဆိုဟာ ရီးရဲလ်ဆိုစီဒက်ရဲ့ လူငယ်အကယ်ဒမီကနေ ပေါ်ထွက်လာခဲ့တာဖြစ်ပြီး လီဗာပူးကို မပြောင်းခင် ဆိုစီဒက် အသင်းကြီးမှာ ၄ နှစ် ကစားခဲ့တာပါ။ ကစားသမားဘဝကို အနားယူခဲ့ပြီးနောက် အလွန်ဆိုဟာ နောက်နှစ်မှာ ရီးရဲလ်မက်ဒရစ် ယူ ၁၄ အသင်းကို နည်းပြတာဝန်ယူခဲ့ပါတယ်။ ဒါပေမယ့် ၂၀၁၉ မှာ ဆိုစီဒက်ထံ ပြန်လာခဲ့ပြီး ‘အိမ်ကို ပြန်လာဖို့ အခိုက်အတန့်တစ်ခုက အမြဲတမ်းရှိပါတယ်’လို့ ရှင်းပြခဲ့ပါတယ်။
ပရော်ဖက်ရှင်နယ် ဘောလုံးလောကက၊ ပြိုင်ပွဲတွေ၊ လေ့ကျင့်ရေးတွေက ဘယ်လိုလဲဆိုတာ သူတို့ကို သိစေချင်ပြီး သူတို့ လုပ်ဖို့လိုတဲ့ အလေ့အကျင့်တွေကို ကျွန်တော်တို့ သင်ကြားပေးတယ်။ ဒါက ကျွန်တော်တို့ရဲ့ လမ်းကြောင်းပါပဲ။
ကျွန်တော်တို့က သူတို့ကို ပထမအသင်းအတွက် အဆင်သင့်ဖြစ်အောင် မှန်မှန်ကန်ကန် လမ်းကြောင်းပေးရတာပါ”လို့ အလွန်ဆိုက ပြောဆိုခဲ့တာ ဖြစ်ပါတယ်။
